වෙනස්කම් සමඟ එළි දකින 2023 ෆෝමියුලා වන් කැලැන්ඩරය

2022 වර්ෂය අවසන් වී 2023 නව වසර උදා වූයේ ක්‍රීඩාවට ද නව තරග කාලසටහන් රැසක් එකතු කරමින්. එලෙස පවත්වන තරග අතරේ ලොව පුරා ජනප්‍රිය ක්‍රීඩාවක් ව තිබෙන ෆෝමියුලා වන් කැලැන්ඩරයද නිකුත් කිරීමට කටයුතු කර තිබෙනවා.

2022 වර්ෂයට වඩා තවත් අදියරක් වැඩි කරමින් 2024 තරගවාරය ආරම්භ කිරීමට සූදානමින් පැවතීම ද විශේෂත්වයක්.

කණ්ඩායම් 10 ක රියදුරන් 20 දෙනෙක් සුපුරුදු පරිදි ෆෝමියුලා වන් ලෝක ශූරතාව වෙනුවෙන් සටන් වදිනවා. තරගවාරය ආරම්භ වීමටත් ප්‍රථමයෙන් පිට පිට ම දෙවතාවක් ෆෝමියුලා වන් ලෝක ශූරතාව ජයග්‍රහණය කර සිටින නෙදර්ලන්තයේ මැක්ස් වර්ස්ටාපන්ට මෙවර ලෝක ශූරතාව දිනා ගැනීම වෙනුවෙන් වැඩි ඉඩක් පවතින බවට මත පළ වනවා. ඔහුට අමතර ව ෆෙරාරි ධාවක ශෝල් ලෙක්රෙක්, මර්සිඩීස් ධාවකයන් දෙපළ වන ලුවිස් හැමිල්ටන් සහ ජෝර්ජ් රසල් පිළිබඳවත් අවධානය යොමුව තිබෙනවා.

කණ්ඩායම් සහ ධාවකයෝ

පෙර සඳහන් කළ ආකාරයට ම කණ්ඩායම් 10 ක ධාවකයන් 20 දෙනෙක් ලෝක ශූරතාව වෙනුවෙන් සටන් වැදීමට සූදානම්. නැවත වතාවක් 2023 සිට මෝටර් රථ සඳහා එන්ජින් ලබා දීමට හොන්ඩා සමාගම එක් වී තිබෙනවා. රෙඩ්බුල් සහ ඇල්පා ටවුරි වෙනුවෙන් එන්ජින් ලබා දීමටයි හොන්ඩා සූදානමින් පසු වන්නේ.

2022 වර්ෂයේ දී විලියම්ස් කණ්ඩායම සමඟ සිටි නිකොලස් ලටීෆි වෙනුවට ලොගාන් සාර්ජන්ට්, මැක්ලරන් සමඟ සිටි ඩැනියෙල් රිකාඩෝ වෙනුවට ඔස්කාර් පියෙස්ට්‍රි, හාස් කණ්ඩායමේ සිටි මික් ෂූමාකර් වෙනුවට නිකෝ හල්කන්බර්ග්, ඇස්ටන් මාර්ටින් කණ්ඩායමේ සිට විශ්‍රාම ගිය සෙබස්තියන් වෙටල් වෙනුවට ෆර්නැන්ඩෝ ඇලොන්සෝ, ඇල්පා ටවුරි කණ්ඩායමේ සිටි පියර් ගැස්ලි වෙනුවට නික් ඩි ව්‍රීස් සහ ඇල්පීන් සමඟ සිටි ෆර්නැන්ඩෝ ඇලොන්සෝ වෙනුවට පියර් ගැස්ලි එකතු වී සිටිනවා. 2022ට වඩා 2023 දී වෙනස්කම් සිදු ව ඇත්තේ එපමණ යි.

2023 තරගවාරයේ ධාවනයේ යෙදෙන කණ්ඩායම් සහ ධාවකයෝ

කණ්ඩායම	එන්ජින් වර්ගය	ධාවකයා	ධාවකයා ගේ රට	ධාවකයාගේ වයස (2023 ජනවාරි 01 ට)
ඇල්ෆා රෝමියෝ	ෆෙරාරි	ජෝ ග්‍යැන්‍යූ	චීනය	23
ඇල්ෆා රෝමියෝ	ෆෙරාරි	වල්ටෙරි බොටාස්	පින්ලන්තය	33
ඇල්පා ටවුරි	හොන්ඩා RBPT	නික් ඩි ව්‍රීස්	නෙදර්ලන්තය	27
ඇල්පා ටවුරි	හොන්ඩා RBPT	යුකි ට්සුනෝඩා	ජපානය	22
ඇල්පීන්	රෙනොල්ට්	පියර් ගැස්ලි	ප්‍රංශය	26
ඇල්පීන්	රෙනොල්ට්	එස්ටෙබාන් ඔකෝන්	ප්‍රංශය	26
ඇස්ටන් මාර්ටින්	මර්සිඩීස්	ෆර්නැන්ඩෝ ඇලොන්සෝ	ස්පාඤ්ඤය	41
ඇස්ටන් මාර්ටින්	මර්සිඩීස්	ලාන්ස් ස්ට්‍රෝල්	කැනඩාව	24
ෆෙරාරි	ෆෙරාරි	ශෝල් ලෙක්රෙක්	මොනාකෝ	25
ෆෙරාරි	ෆෙරාරි	කාලෝස් සයින්ස්	ස්පාඤ්ඤය	28
හාස්	ෆෙරාරි	කෙවින් මැග්නසන්	ඩෙන්මාර්කය	30
හාස්	ෆෙරාරි	නිකෝ හල්කන්බර්ග්	ජර්මනිය	35
මැක්ලරන්	මර්සිඩීස්	ලැන්ඩෝ නොරිස්	බ්‍රිතාන්‍ය	23
මැක්ලරන්	මර්සිඩීස්	ඔස්කාර් පියෙස්ට්‍රි	ඕස්ට්‍රේලියාව	21
මර්සිඩීස්	මර්සිඩීස්	ලුවිස් හැමිල්ටන්	බ්‍රිතාන්‍ය	37
මර්සිඩීස්	මර්සිඩීස්	ජෝර්ජ් රසල්	බ්‍රිතාන්‍ය	24
රෙඩ්බුල්	හොන්ඩා RBPT	මැක්ස් වර්ස්ටාපන්	නෙදර්ලන්තය	25
රෙඩ්බුල්	හොන්ඩා RBPT	සර්ජියෝ පෙරෙස්	මෙක්සිකෝව	32
විලියම්ස්	මර්සිඩීස්	ලොගාන් සාර්ජන්ට්	අමරිකාව	21
විලියම්ස්	මර්සිඩීස්	ඇලෙක්ස් ඇල්බොන්	තායිලන්තය	26

මෙම කරුණුවලට අමතර ව 2023 ෆෝමියුලා වන් ලෝක ශුරතාව සඳහා ද පිරෙලි ටයර් පමණක් භාවිත කිරීමට තීරණය කොට තිබෙනවා. පෙර පරිදිම සොෆ්ට්, මීඩියම් සහ හාඩ් යන සාමාන්‍ය ටයර් වර්ග තුනත් වැසි හෝ ධාවන පථය ලිස්සනසුලු අවස්ථාවල දී ඉන්ටර් මීඩියඩ් සහ වෙට් යන ටයර් වර්ග ද්විත්වයත් භාවිත කිරීමටත් නියමිත යි.

තවත් වෙනස්කම් කිහිපයක්

2022 තරග වාරයට වඩා මෙවර තරග වාරයේදී මෝටර් රථය සහ පොළොව අතර පවතින පරතරය මිලිමීටර් 15 ක පමණ උසකින් වැඩි කිරීමට තීරණය කොට තිබෙනවා. ජෝ ග්‍යැන්‍යූ පසුගිය බ්‍රිතාන්‍ය අදියරේ දී මුහුණ දුන් දරුණු අනතුරේ දී ඔහුගේ මෝටර් රථය ඉහළට විසි වුණා. මේ හේතුවෙන් තවදුරටත් එවැනි අනතුරක දී රියදුරන් ගේ ආරක්ෂාව වෙනුවෙන් මෝටර් රථය නවීකරණය කිරීමට ද සැලසුම් සකස් කෙරෙනවා.

2023 සිට ධාවන තරග වඩාත් තිරසාර කිරීමේ අරමුණින් එක් තරග අදියරක් සඳහා ලබා දෙන ටයර් කට්ටල ප්‍රමාණය 13 සිට 11 දක්වා අඩු කිරීමට ද FIA තීරණය කළා. පිරෙලි සමාගම පෙර වසරවල නිෂ්පාදනය කළ C1 සහ C2 සංයෝග අතරට තවත් සංයෝගයක් එකතු කරමින් නව ටයර් නිෂ්පාදනය කිරීමට බලාපොරොත්තු වීම ද විශේෂත්වයක්. මේ හේතුවෙන් නව ටයර්වල ග්‍රහණයේ වෙනස් වීමක් ද අපේක්ෂා කෙරෙනවා.

වඩා හොඳ දැකීමක් ලබා ගැනීමට මෝටර් රථයේ පැති කණ්ණාඩි ද්විත්වය තවත් පුළුල් කොට සැකසීමට අවසරය ලබා දී තිබෙනවා. මීට අමතර ව 2022 දී පැවති ස්ප්‍රින්ට් ආකෘති තරග 3, 2023 දී 6ක් දක්වා වැඩි කිරීමට FIA තීරණය කළා. අසර්බයිජානය, ඔස්ට්‍රියාව, බෙල්ජියම, කටාර්, අමරිකා එක්සත් ජනපදය සහ බ්‍රසීලයේ පවතින අදියරවලදී මෙම ස්ප්‍රින්ට් තරග පැවැත්වීමට සූදානම්.

FIA නීති සංග්‍රහයේ (ISC)[c] “දේශපාලන, ආගමික සහ පුද්ගලික ප්‍රකාශ” යන නීතිය නැවත යාවත්කාලීන කිරීමට කටයුතු යොදා තිබුණා. එහිදී 12.2.1 වගන්තියෙන් එලෙස රියදුරෙක් දේශපාලන, ආගමික හෝ පුද්ගලික මතයක් සම්බන්ධයෙන් විරෝධතාවක් හෝ යම් පණිවිඩයක් ලබා දීමට ප්‍රථමයෙන් අනිවාර්යයෙන් ම FIA වෙතින් අවසරය ලබා ගත යුතු වනවා. අවසරයෙන් තොර ව පවත්වන ඕනෑම විරෝධතාවක් FIA නීති කඩ කිරීමක් වන බවට ද නව නීති අනුව සඳහන්.

මෙයට අමතර ව අවසන් වශයෙන් කොවිඩ් 19 වෛරසය නිසා පැනවූ නීති බොහෝ ප්‍රමාණයක් ලිහිල් කිරීමට කටයුතු යොදා තිබෙනවා. පසුගිය තරගවාරයේ දී මුඛ ආවරණ පැළඳීම අනිවාර්ය නොවූ අතර මෙවර තරග වාරයේ දී එන්නත ලබා ගැනීමේ අනිවාර්යය නීතිය වෙනස් කිරීමට FIA කටයුතු කළා.

(*FIA යනු Federation Internationale de l’Automobile ය. එහි FIA F1 මගින් ෆෝමියුලා වන් නීති සංශෝධනය කරනු ලබයි)

අදියර පැවැත්වෙන ආකාරය

2023 නව ෆෝමියුලා වන් ලෝක ශූරතාව මාර්තු 05 වන දා, බහරේනයේ දී ආරම්භ වීමට සියලු කටයුතු සූදානම්. අදියර 23 කින් යුක්ත මෙවර ලෝක ශූරතාව 2023 නොවැම්බර් මස 26 වනදා, අබුඩාබි අදියරෙන් අවසන් වීමට සැලසුම් සකස් කොට තිබෙනවා.

ඉතිහාසයේ පළමු වතාවට අමෙරිකා එක්සත් ජනපදයේ ලාස් වේගාස් හී ෆෝමියුලා වන් ලෝක ශූරතා අදියරක් පැවැත්වීමට නියමිත යි. මයාමි, ටෙක්සාස් සහ ලාස් වේගාස් වශයෙන් මෙවර අමෙරිකා එක්සත් ජනපදය තුළ පැවැත්වෙන තරග සංඛ්‍යාව 3 ක්. ලාස් වේගාස් අදියර නගරය තුළ සාමාන්‍ය මහාමාර්ගය භාවිත කරමින් පැවැත්වීම ද විශේෂත්වයක්.

එම ලාස් වේගාස් අදියරට අමතර ව අසර්බයිජානයේ බාකු, මොනාකෝ සහ සිංගප්පූරු අදියර ද මහා මාර්ගය තුළ සැකසූ ධාවන පථයක ක්‍රියාත්මක වනවා. මෙම ධාවන තරග 23 අවසන් වන විට ප්‍රසාද ලකුණු සටහනේ ඉදිරියෙන් ම පසුවන ධාවකයාට ෆෝමියුලා වන් ලෝක ශූරතාව හිමි වීමට නියමිත යි.

අදියරක් ජයග්‍රහණය කළ විට ප්‍රසාද ලකුණු 25ක්, දෙවන ස්ථානයට 20ක්, තෙවන ස්ථානයට 15ක්, සිව්වන ස්ථානයට 12ක්, පස්වන ස්ථානයට 10ක්, හයවන ස්ථානයට 8ක්, හත්වන ස්ථානයට 6ක්, අටවන ස්ථානයට 4ක්, නමවන ස්ථානයට 2ක් සහ දසවන ස්ථානයට 1ක් වශයෙන් ප්‍රසාද ලකුණු හිමි වනවා.

අදියර 23 පැවැත්වෙන ආකාරය

අංකය	දිනය	රට	පැවැත්වෙන ධාවන පථය
01	2023 මාර්තු 5	බහරේන අදියර	බහරේන් ජාත්‍යන්තර ධාවන පථය
02	2023 මාර්තු 19	සෞදි අරාබි අදියර	ජෙදා ධාවන පථය
03	2023 අප්‍රේල් 02	ඕස්ට්‍රේලියා අදියර	ඇල්බර්ට් පාක් ධාවන පථය මෙල්බර්න්
04	2023 අප්‍රේල් 30	අසර්බයිජාන් අදියර	බාකු නගර ධාවන පථය
05	2023 මැයි 07	අමරිකා එක්සත් ජනපද අදියර	මයාමි ජාත්‍යන්තර ධාවන පථය ෆ්ලොරිඩා
06	2023 මැයි 21	ඉතාලි අදියර	ඉමෝලා ධාවන පථය
07	2023 මැයි 28	මොනාකෝ අදියර	මොනාකෝ නගර ධාවන පථය
08	2023 ජුනි 4	ස්පාඤ්ඤ අදියර	බාසිලෝනා ධාවන පථය කැටලෝනියාව
09	2023 ජුනි 18	කැනඩා අදියර	ජිල්ස් විලනුයේ ධාවන පථය මොන්ට්‍රියෙල්
10	2023 ජූලි 02	ඔස්ට්‍රියා අදියර	රෙඩ් බුල් රින්ග් ධාවන පථය
11	2023 ජූලි 9	බ්‍රිතාන්‍ය අදියර	සිල්වර්ස්ටෝන් ධාවන පථය
12	2023 ජූලි 23	හංගේරියා අදියර	හංගරෝරින් ධාවන පථය
13	2023 ජූලි 30	බෙල්ජියම් අදියර	ස්පා-ෆ්‍රැන්කොචෑම්ප්ස් ධාවන පථය
14	2023 අගෝස්තු 27	නෙදර්ලන්ත අදියර	සැන්ඩ්වෲට් ධාවන පථය
15	2023 සැප්තැම්බර් 03	ඉතාලි අදියර	මොන්සා ධාවන පථය
16	2023 සැප්තැම්බර් 17	සිංගප්පූරු අදියර	මරීනා බේ මාර්ග ධාවන පථය
17	2023 සැප්තැම්බර් 24	ජපාන අදියර	සුසුකා ජාත්‍යන්තර ධාවන පථය
18	2023 ඔක්තෝබර් 08	කටාර් අදියර	ලුසයිල් ජාත්‍යන්තර ධාවන පථය
19	2023 ඔක්තෝබර් 22	අමරිකා අදියර	අමරිකා ධාවන පථය ටෙක්සාස්
20	2023 ඔක්තෝබර් 29	මෙක්සිකෝ අදියර	ඔටෝඩෝර්මෝ හර්මානොස් රොද්රිගෙස් ධාවන පථය
21	2023 නොවැම්බර් 05	බ්‍රසීල අදියර	සාඕ පාලෝ ධාවන පථය
22	2023 නොවැම්බර් 18	අමරිකා අදියර	ලාස් වේගාස් මාර්ග ධාවන පථය
23	2023 නොවැම්බර් 26	එක්සත් අරාබි එමීර් රාජ්‍ය අදියර	යාස් මරීනා ධාවන පථය අබුඩාබි

*ඉහත නම් සඳහන් කිරීමේදී එම රටේ භාෂාවට අනුව කෙරෙන උච්චාරණය සැලකූ බව කරුණාවෙන් සලකන්න