Varuni Amarasinghe
බහුවිධ ජනවර්ග රැසකට සෙවණ ලබා දෙන නිවහන ඉන්දියාව යි. එහි දක්නට ලැබෙන බහුවිධත්වය භුක්ති විඳීමට දෙස් – විදෙස් ධනවත් පැළැන්තිය ‘ සුඛෝපභෝගී ඉන්දීය දුම්රිය සංචාරයක් ’ සිදු කිරීමට ප්‍රිය කරනවා. එලෙස සිදු කරන දුම්රිය සංචාරය සැප පහසුවත්, මහරාජාවරයෙකු සේ ගාම්භීර ව ගමන් කිරීමටත් ඉහත කී පැළැන්තිය’ මහරාජාස් එක්ස්ප්‍රස්’ දුම්රියට මහත් උද්යෝගයකින් ගොඩවනවා.
මහාරාජාගේ සම්ප්‍රාප්තිය
2010 වසරේ සිය මංගල ගමන ආරම්භ කළ “මහාරාජාස් එක්ස්ප්‍රස්”, එකල ඉන්දියාවේ ධාවනය වූ සුඛෝපබෝගී දුම්රිය මුහුණ පෑ අඩුපාඩුකම් සහ දෝෂ රැසක් මඟ හරිමින් එරට සංචාරක ක්ෂේත්‍රය වැඩි දියුණු කිරීමට ඉන්දීය දුම්රිය සේවයට එක් වූවා.
ධනයෙන් සහ බලයෙන් පොහොසත් මහාරාජාවරුන් රැසක් අතීත ඉන්දියාවේ වාසය කළා. මොවුන් ගතකළ එම සශ්‍රීක දිවිපෙවෙත රිසිසේ නැවත අත්විදීමට ’’ මහාරාජාස් එක්ස්ප්‍රස් ‘’ දුම්රියට ගොඩවූවකුට යළි හැකියාව ලැබෙනවා.
ජනාධිපතිවරයකුට පවා ගමන් කළ හැකි මැදිරිය
අති විශිෂ්ට මඟී සේවයක් සැමවිට ලබා දෙන ‘’මහාරාජාස් එක්ස්ප්‍රස්’’, ‘රාජකීය’ තේමාටව අනුව නිර්මිත අති සුඛෝපභෝගී දුම්රිය මැදිරි බොහෝමයකින් සමන්විත යි.
මීට අමතරව මෙම දුම්රිය, ඩීලක්ස් මැදිරි පහකින් (Deluxe Cabin cars), ජූනියර් සූට් මැදිරි හයකින් (Junior Suite cars), සූට් මැදිරි දෙකකින් (Suite cars) සහ ජනාධිපතිවරයකුට පවා ගමන් කළ හැකි (Exclusive Presidential Suite car) ‘නවරත්න’ (Navratna) නම් සුවිශේෂ මැදිරියකින් ද සමන්විත වනවා.
මහාරාජාගේ ගමන් මඟ
මුම්බායෙන් පටන් ගන්නා සිය සංචාරය දිල්ලියෙන් අවසන් කිරීමට “මහාරාජාස් එක්ස්ප්‍රස්” පුරුදු ව සිටිනවා. මෙම සුප්‍රසිද්ධ දුම්රිය ගමනට ඉන්දියාවේ මධ්‍යම සහ වයඹ දිග සංචාරක ස්ථාන ඇතුළත් ව නැතත්, සැලසුම් සහගත දුම්රිය මාර්ග හතරක පමණ ගමන් කිරීමට ‘මහාරාජාස්’ට හැකි ව තිබෙනවා.
ඉන්දීය ගමනාන්ත 12 කට වැඩි ප්‍රමාණයක් මෙම දුම්රිය මාර්ග හතරින් ආවරණය වනවා. ලෝක උරුම අඩවි, කලාත්මක සහ සංස්කෘතික ස්ථාන රාශියක් ආවරණයට මෙම දුම්රිය මාර්ග හතර සමත් වනවා.
මහාරාජා ගමන් ගන්නා සුවිශේෂී දුම්රිය මාර්ග හතර පිළිවෙළින්, හෙරිටේජ් ඔෆ් ඉන්දියා ’Heritage of India’, ඉන්දියානු පැනොරාමා ‘Indian Panorama’, ඉන්දියානු ස්ප්ලෙන්ඩර් ‘Indian Splendor’ සහ ඉන්දියානු ට්‍රෙෂර්ස් ‘Treasures of India’ යන අන්වර්ථ නාමයන්ගෙන් හඳුන්වනවා.
හෙරිටේජ් ඔෆ් ඉන්දියා ’Heritage of India’ දුම්රිය මාර්ගය ඔස්සේ මුම්බායි – උඩයිපුර් – ජෝද්පුර් – බිකනෙර් – ජායිපූර් – රන්තම්බෝර් සහ ෆතේපූර් සික්රි – අග්‍රා හරහා දිල්ලිය දක්වාත්,
ඉන්දියානු පැනොරාමා ‘Indian Panorama’ දුම්රිය මාර්ගය ඔස්සේ දිල්ලි – ජායිපූර් – රන්තම්බෝර් සහ ෆතේපූර් සික්රි – අග්‍රා – ඕර්චා – ඛජුරාහෝ – වරනාසි හරහා දිල්ලිය දක්වාත්,
ඉන්දියානු ස්ප්ලෙන්ඩර් ‘Indian Splendor’ දුම්රිය මාර්ගය ඔස්සේ දිල්ලි – අග්‍රා – රන්තම්බෝර් – ජායිපූර් – බිකානර් – ජෝද්පූර් – උදයිපූර් හරහා මුම්බායි දක්වාත්,
අවසාන වශයෙන් ඉන්දියානු ට්‍රෙෂර්ස් ‘Treasures of India’ දුම්රිය මාර්ගය ඔස්සේ දිල්ලි – අග්‍රා – රන්තම්බෝර් – ජායිපූර් හරහා දිල්ලිය දක්වාත් ‘’මහාරාජාස් එක්ස්ප්‍රස්’’ දුම්රිය ධාවනය වනවා.
නවීන පහසුකම් සහ විශේෂාංග
‘රං මහල්’ සහ ‘මයුර් මහල්’ යන අවන්හල් ද්විත්වය මහාරාජාස් එක්ස්ප්‍රස් දුම්රිය මඟීන්ට ආහාර පාන සපයනවා. රන් ආලේපිත හැඳි ගෑරුප්පු වලින් ආහාර අනුභවය මෙහි සිදු කළ යුතු අතර සාමාන්‍ය වැසියන්ට රාජකීය අත්දැකීමක් ලබා ගැනීමට මෙහිදී පුළුවන්. ඉන්දියානු සහ විවිධ ජනවර්ගවලට අයත් ආහාර බොහෝමයක් මෙම අවන්හල් ද්විත්වයෙන් රස විඳිය හැකි යි.
මීට අමතර ව අංගසම්පූර්ණ පුස්තකාලයක්, විවේකාගාරයක්, වයින්වලින් සප්පායම් විය හැකි ‘සෆාරි බාර්’, සෑම විට ම යා හැකි ‘රාජා ක්ලබ්’ මෙන් ම අන්තර්ජාල, දුරකථන ඇමතුම්, උණු ජලය, විදුලිය, හිස කෙස් වියළන යන්ත්‍ර, CCTV කැමරා, ගිනි අනතුරු ඇඟවීම් ස්ථාන, කුඩා සිනමාහලක්, RFID දොර අගුල් සහිත නිදන කාමර, නාන කාමර සහ නැරඹුම් මැදිරි වැනි නවීන පහසුකම් රැසකින්ද ’මහාරාජාස් එක්ස්ප්‍රස්’ සමන්විත වනවා.
ටිකට්ටුවක ගාස්තුව
මහාරාජාස් එක්ස්ප්‍රස් දුම්රියේ ගමන් ගාස්තුව, එම විශේෂිත මඟියා ගමන් ගන්නා දුම්රිය මැදිරි කාණ්ඩය සහ ගමන් විස්තරය අනුව වෙනස් වනවා. මෙහි අවම ගාස්තුව ඩොලර් 3490කින් ඇරඹෙනවා.
ගමන් ගන්නා සාමාජික ගණන මත එය ඩොලර් 23, 700 දක්වා ඉහළ යාම සිදු වනවා. මෙම දුම්රිය ගාස්තුවලට බදු ඇතුළත් වීමක් සිදු වන්නේ නැහැ.
මනස්කාන්ත හිරු බැස යන සැන්දෑවන්, වැලි කඳුවල දර්ශනීයත්වය, පුරාණ මාලිගා සහ බළකොටුවලට උදෑසන හිරු පතිත වන ආකාරය, සුප්‍රසිද්ධ ගංගා නදීචාරිත්‍ර, සංස්කෘතික සංදර්ශන, පෞද්ගලික සාප්පු සවාරි, ප්‍රීතිමත් රූකඩ සංදර්ශන, අලි පෝලෝ තරඟ ඇතුළු තවත් බොහෝ ක්‍රියාකාරකම් රැසක් අත්විදීමට ද මහාරාජාස් එක්ස්ප්‍රස් හි ගමන් ගන්නා මඟීන්ට ඉඩකඩ සැලසෙනවා.
