ආර්තවය, මාස් ශුද්ධිය, ඔසප් වීම ආදී විවිධ නම්වලින් හඳුන්වන ක්‍රියාවලිය වන්නේ, වැඩිවිය පැමිණි ස්ත්‍රියකගේ ගර්භාෂයේ ඇති අන්තෝමාතෘකයෙන් (එන්ඩොමේට්‍රියම) ශ්ලේෂ්ම පටක ගැලවී රුධිරය සමග යෝනිය හරහා පිටවීම යි. මෙය මුල්වරට සිදුවීම ‘මල්වර වීම’ ලෙස හඳුන්වන අතර සාමාන්‍යයෙන්, දැරිවියකගේ පියයුරු වර්ධනය වීම ඇරඹී අවුරුදු 2කට පමණ පසු එය සිදු වේ. එසේ ඇරඹෙන ආර්තවය කිසියම් සති ගණනකට වරක් (වැඩිහිටියන්ගේ බොහෝවිට සති 4-5) සිදුවෙමින් අවුරුදු 40-50 අතර ඇතිවන ‘ආර්තවහරණය’ දක්වා පවතී.