1960 දශකය ඇමරිකාවේ ඉතිහාසය වෙනස් කළ දශකයක්. මේ සමයේදී ඇමරිකානු තරුණ කොටස් අතර විවිධ රැඩිකල් අදහස් රෝපණය වුණා. එමෙන්ම මත්ද්‍රව්‍ය භාවිතය ද ඉහළ ගියා. මුලින් මරුවානා භාවිතය බෙහෙවින් ප්‍රකට වූ නමුත් 1970 වනවිට කොකේන් වඩා ජනප්‍රිය වීමට පටන් ගත්තා.

කොලොම්බියාවේ අන්දීස් කඳුකර ප්‍රදේශය මැදින් ගලා යන ගංගාවක් වුණා. එහි ජලය අඳුරු පැහැයට හුරු වර්ණයකින් දිස් වූ අතර එහෙයින් එම නදියට රියෝනෙග්‍රෝ (අඳුරු නදිය​) යයි නමක් ලැබුණා. මෙම ප්‍රදේශයේ 16 වන සියවසෙහි පමණ රියෝනෙග්‍රෝ නම් නගරයක් ද ස්ථාපිත කෙරුණා. 19 වන සියවස වනතුරු එය එම ප්‍රදේශයෙහි ප්‍රධානම නගරයක් වූ අතර 1863 කොලොම්බියානු ආණ්ඩුක්‍රම ව්‍යවස්ථාව ද සම්මත කරන ලද්දේ එහිදී යි. පසු කලෙක, මෙඩෙයීන් නගරය විශාලත්වයෙන් වැඩි වීමත් සමග රියෝනෙග්‍රෝ නගරයේ වැදගත්කම අඩු වුණා.