මහා දෙවිවරු පෘථිවියට ආපු කාලයේ ග්‍රීසියේ හෙ‍රැක්ලීස් නම් වීරයෙකු හිටියා (රෝමකයින් මොහුව දන්නේ “හර්කියුලීස්” යන නමින්). ග්‍රීක මහා දෙවි සූස්, ඇල්ක්මිනි නම් මනුෂ්‍ය කාන්තාව හා සහවාසයෙන් ඉපදෙන හෙ‍රැක්ලීස් අර්ධ දෙවියෙක්. සිය පුරුෂයාගේ කාම මිථ්‍යාචාරයේ ප්‍රතිඵලය වූ හෙ‍රැක්ලීස් කෙරෙහි දෙවියන්ගේ ‍රැජිණ වූත්, සූස්ගේ භාර්යාව වූත් හීරා දෙවඟනට තිබුණේ තදබල වෛරයක්. ඈ විසින් වරක් හෙ‍රැක්ලීස්ව තාවකාලික උමතු තත්ත්වයකට පත්කරවන අතර, හෙ‍රැක්ලීස් අවසිහියෙන් සිය බිරිඳවත්, දරුවන් දෙදෙනාවත් මරා දමනවා. තමන් කළ අපරාධය වැටහීමෙන් පසු දරුණු සිත්වේදනාවට පත්වෙන හෙ‍රැක්ලීස් ඩෙල්‍ෆිහි අනාගතවක්තෘවරිය හමුවන්නට යන්නේ සිය වරද සමාකරගන්නේ කෙසේද යන්න දැනගැනීමේ අරමුණෙන්.