ජලය සමග මිනිසාට පවතින්නේ වෙන් කළ නොහැකි පුදුමාකාර සබැඳියාවකි. විවේකයක් ලද අවස්ථාවක දී ගහකොළින් වට වූ මනරම් ඉසව්වක පවත්නා සොඳුරු දිය දහරකට පැන විඩාබර ගතෙහි ගිනියම නිවා ගැනීමට කවුරුත් ප්‍රිය කරයි. කෘත්‍රිමව සකසන ලද තටාකයකට වඩා ස්වභාවික දිය දහරක ඇත්තේ මිනිසා වශී කරවන ආකාරයේ පෙනුමකි. කෙසේ නමුත් බොහෝ විට තටාකයක් වූ කලී මිනිසා විසින් සිදු කරන නිර්මාණයකි. ස්වභාවික තටාකයක පිහිටීම අතිශයින් විශේෂිත වන්නේ එය දුර්ලභ ගණයේ පිහිටීමක් වන හෙයිනි. එවන් දුර්ලභ ගණයේ ස්වභාවික තටාක සමූහයක් හිමි කර ගැනීමට තරම් තුර්කිවාසීන් වාසනාවන්ත වී ඇත. යම් හෙයකින් ඔබ සොයන්නේ විස්මයජනක දර්ශන පථයක් සහිත පිරිසිදු සහ විශේෂිත ගුණයන්ගෙන් යුත් ජලයෙන් සමන්විත තටාකයක් නම් මෙවර ඔබේ සංචාරය යොදාගත යුත්තේ තුර්කියට ය.